Ынтымақтастық перспективалары: ғылым және бизнес
Жаңалықтар
2024 жылы 15 мамырда Астана қаласында «Астана» халықаралық қаржы орталығында Қазақстан мен Германия арасындағы экономикалық байланыстарды нығайтуға арналған Берлин Еуразиялық Клубының мерейтойлық 40-шы отырысы өтті. Оған екі елдің мемлекеттік органдарының, іскерлік қауымдастықтарының, сараптамалық, ғылыми және бизнес-қоғамдастығының өкілдері қатысты. Панельдік талқылаудың негізгі тақырыбы жаңа институционалдық және құқықтық шеңберлерде шикізат, өнеркәсіп және технологиялық салалардағы әріптестік туралы келісімді іске асыру болды. Бұл кездесу Германиямен, әсіресе агроөнеркәсіп кешенінде, өңдеу өнеркәсібінде және инфрақұрылымдық жобаларда әріптестігімізді тереңдетудегі маңызды қадам болып табылады.
Баспасөз қызметі осы маңызды іс-шарада А. И. Бараев атындағы Астық шаруашылығы орталығының атынан қатысқан адаптивті және агроландшафттық технологиялар зертханасының меңгерушісі Қанат Ашкеевич Ақшаловқа жүгінді. Қанат Ашкеевич екіжақты ынтымақтастық тақырыбы туралы өз әсерлерімен бөлісті, сондай-ақ біздің орталықтың неміс ғылыми қоғамы мен агробизнес өкілдерімен ынтымақтастығының тиімділігі туралы айтып берді.
Германия делегациясын Қазақстан Президенті Қ.К. Тоқаев қабылдады. Сондай-ақ, неміс делегациясы түрлі министрліктерде, соның ішінде ҚР Ауыл шаруашылығы министрлігінде бірқатар кездесулер өткізді.
Қазақстандық тарап үшін негізгі мақсат-заманауи технологияларды, инвестицияларды тарту, ғылыми-техникалық ынтымақтастық болып табылады. Қазақстаннан келген беделді команданың қатысуы бұл кездесудің маңыздылығын атап өтті. Отандық экономиканың жай-күйі, отандық, қазақстандық өнімдерді өндіру, Қазақстанда шикізат өнімдерін қайта өңдеу, азық-түлік қауіпсіздігі және отандық өнімдердің әлемдік нарыққа шығуы туралы ашық диалог өте тиімді өтті. Неміс тарапы үшін, Қазақстанның шикізат қорлары, инвестициялар мүмкіндігі және бізде кәсіпорындар мен агробизнестің ашылуы қызығушылық тудырады.
Климаттың өзгеруінен бастап ғылыми-техникалық ынтымақтастыққа дейінгі ауыл шаруашылығы мәселелері бойынша нәтижелі диалог өтті. Азық-түлік қауіпсіздігі және ауыл шаруашылығы саласындағы ынтымақтастық жөніндегі диалогта Қазақстанның «Жасыл дәліз» арқылы Еуропа, Қытай нарықтарын пайдалана отырып, ауыл шаруашылығы өнімдерін қайта өңдеуді және экспорттық әлеуетті ұлғайту мүмкіндіктері туралы айтылды. Біздің агроөнеркәсіптік кешеніміздің экологиялық таза ауыл шаруашылығы өнімін ұлғайту, қант қызылшасын өндіру әлеуеті және қантқа тәуелділіктен арылу перспективалары атап өтілді.
Арнайы панельдік секция климаттың өзгеруі, аграрлық ғылымның дамуы және озық технологиялар трансферті тақырыбына арналды. Германия тарапы ауыл шаруашылығы машиналарын жасауға, суаруды дамытуға, ауыл шаруашылығы секторында орнықты даму және құзыреттілік орталығын құруға инвестиция салуға дайын.
А. И. Бараев атындағы Астық шаруашылығы ғылыми-өндірістік орталығы неміс ғалымдарымен жақсы ғылыми байланыста. 20 жылдан бері біз дақылдарды себу процестерін механикаландыру, топырақтың деградациясы, климаттың өзгеруі, топырақ құнарлылығы саласында айтарлықтай маңызды зерттеулер жүргізіп келеміз. «Amazone» зауытымен (доктор Т.Майнель), Мартин Лютер ат. университетпен, Геоғылым және география институтымен (профессор Г.Шмидт), Лейбниц Ганновер ат. университетінің топырақтану институтымен (профессор Г. Гутенберг) және т. б. тұрақты байланыстар орнатылды.
