Александр Герасимович Громов

А.И.Бараев атындағы АШҒӨО-да аянбай еңбек еткен ғалымдардың бірі - техника ғылымдарының докторы (1987), инженер-механик Александр Герасимович Громов.

Александр Громов 1935 жылы 1 қыркүйекте Алтай өлкесінің Краснощековский ауданындағы Усть-Козлуха селосында туған. А.Г.Громовтың өмірбаяны құрмет пен өнеге етуге тұрарлық. Алтайдың алыс бір деревнясында дүниеге келген қарапайым бала өмірдің соқтықпалы соқпағымен жүріп, азамат болып қалыптасты. Мектепті тәмамдаған соң әскери борышын өтеді. Кейін, 1962 жылы Алтай ауыл шаруашылығы институтына түсіп, оны бітірген соң өндірісте еңбек ете жүріп, Челябинск механикаландыру және электрлендіру институты жанында аспирантурада оқыды.

Александр Громов 1967 жылы Бүкілодақтық астық шаруашылығы ҒЗИ астықты орылған соң өңдеу зертханасының меңгерушісі болып қызметке кірісті.

Ал 1975 жылы механикаландыру бөлімінің меңгерушісі, 1986 жылы директордың ғылыми жұмыс жөніндегі орынбасары болды. Александр Герасимович астық шаруашылығында жалпы алғанда 38 жылдан артық уақыт еңбек етті.

1967 жылы Челябинск қаласында «Тік тербелмелі цилиндрлі тиермен жұмыс істеу процесін зерттеу» тақырыбына техника ғылымдарының кандидаты ғылыми атағына диссертация қорғады.
1984 жылы «Астықты өндіретін аймақтағы жағдайдың қолайсыз факторларына өңдеу жүйелері тұрақтылығының технологиялық негіздері» тақырыбымен техника ғылымдарының докторы ғылыми атағына Челябинск қаласында диссертация қорғады.

Ғылыммен айналысқан жылдары ішінде астықты ору және орылған соң өңдеу жөнінде 55 ғылыми еңбекті жарыққа шығарды, оның ішінде «Астықты сепарациялау және кептіру процестерінің тиімділігі және тұрақтандыру» монографиясы бар. Ол өнертабысы үшін 23 авторлық куәлік пен бастапқы патенттің иегері, сондай-ақ үш аспирант тәрбиелеп шығарған тәлімгер.

Александр Герасимовичтың астықты орылған соң өңдеу жөніндегі еңбектері көптеген ғылыми басылымда жарияланып, ғалым ретіндегі есімі тек Қазақстан мен Ресейде ғана емес, сонымен қатар алыс шетелдерде де таныс.

А.Г.Громов ғылыми жұмыстары үшін КСРО ХШЖК медалімен марапатталған.

1 078 -рет қаралды