А.И. Бараев атындағы АШҒӨО-да Дала күні өтті

Қазақстан Республикасы Ауыл шаруашылығы министрлігінің қолдауымен А.И. Бараев атындағы астық шаруашылығы ғылыми-өндірістік орталығы "Қазақстанның құрғақшылық жағдайында ауыл шаруашылығы дақылдарының тұрақты өндірісі" тақырыбында Дала күнін өткізді.

Іс-шараға Ақмола облысының ауыл шаруашылығы тауар өндірушілері, ауыл шаруашылығы бейініндегі ғылыми ұйымдардың, республикалық және жергілікті атқарушы органдардың өкілдері, ауыл шаруашылығы техникасын жеткізуші отандық және шетелдік компаниялардың мамандары, сондай-ақ мемлекеттік құрылымдардың және басқа да мүдделі тұлғалардың өкілдері жиналды.

Дала күніне арналған құттықтау сөзімен Ақмола облысы әкімінің орынбасары Балпан Мұрат, ҚР Ауыл шаруашылығы министрлігі аграрлық мәселелер департаментінің басшысы Сұлтан Али сөз сөйледі. Пленарлық отырыс барысында "А.И. Бараев атындағы АШҒӨО" ЖШС Басқарма Төрағасы Савин Тимур, қарқынды егіншілік жөніндегі ҒТП жетекшісі Утельбаев Ерлан, фермерлер арасында инновациялық әзірлемелерді енгізу жөніндегі 019 бағдарламаның жетекшісі Айтхожин Серік, LIQUIFORCE басқарушы директоры, Агротехнология және минералды тамақтануды оңтайландыру жобаларының халықаралық сарапшысы Кирюшин Сергей сөз сөйледі. Іс-шараның ресми бөлігінде М.С. Балпан АШҒӨО-мен жемісті ынтымақтастық орнатып, сол арқылы ғылым мен практиканың тығыз дамуына ықпал етіп жүрген агробизнес өкілдеріне алғыс хаттар мен бағалы сыйлықтар табыс етті.

Бұл ауқымды іс-шара ауыл шаруашылығы, ғылыми әзірлемелер және инновациялық агротехнологиялар саласындағы жетістіктерді көрсету үшін бірегей алаңға айналды. Іс-шара аясында танаптық туры барысында Орталықтың жетекші ғалымдары мен практиктері отандық селекцияның сыналған дәнді дақылдарының жаңа сорттарын, майлы, дәнді-бұршақ, жарма және мал азығы дақылдарының заманауи сорттарын ұсынды.

Танаптық стационарларда қатысушыларға ауыл шаруашылығы дақылдарын өсіру технологияларын өзгермелі климаттық жағдайларға бейімдеу бойынша көпжылдық зерттеулердің нәтижелері көрсетілді. Сондай-ақ, мамандандырылған көрмеде заманауи ауыл шаруашылығы техникасы мен агротехнологиялар саласындағы өзекті шешімдер ұсынылды.

Бұл ауқымды іс-шара барлық мүдделі адамдардың жаңа агробизнес жобаларын, идеяларын және жай ғана жанды қарым-қатынасты талқылауға бірігуіне ықпал етті.

Дала күні іс-шаралары аясында АШҒӨО оқу залында "Солтүстік Қазақстандағы органикалық өндірістің өзекті бағыттары: тұқым шаруашылығы, технология, қайта өңдеу" тақырыбында ғылыми - практикалық конференция өтті. Іс-шара барысында қатысушылар тәжірибе алмасып, қазіргі жағдайда органикалық ауыл шаруашылығын дамытудың өзекті мәселелері мен перспективаларын талқылады.

Осы үлкен салалық іс-шараның қорытындысы бойынша А.И. Бараев атындағы астық шаруашылығы орталығы аграрлық ғылымды және жалпы ауыл шаруашылығы саласын ілгерілетуге ықпал ететін ғылыми идеяларға өзінің адалдығын тағы да көрсетті. Жаңа сын-тегеуріндер мен инновациялық-технологиялық талаптарға қарамастан, Орталықтың ғылыми-өндірістік әлеуеті артып келеді. Мұнда ұрпақтар сабақтастығы сақталады, көрнекті ғылым қайраткерлерінің орасан зор мұрасына және сақталған академиялық негіздерге сүйене отырып, жаңашылдық пен шығармашылық идеялар әкелетін ғалымдардың жас өскіндері тәрбиеленеді. Топырақ та, тағдыр да осында тыныстайды.